A Tavau s'inscuntran a partir da dumengia passa 700 perscrutadras e represchentants d'organisaziun nun-guvernamentalas al «World Biodiversity Forum». A l'inscunter duai vegnir definì finamiras per cumbatter la spariziun da las spezias, communitgeschan ils organisaturs.
L'onn 2015 ha la communitad mundiala decidì en la Cunvegna da Paris davart il clima da tegnair la stgaudada globala sut 2 grads, meglier anc sut 1,5 grads. Era sche il spazi da temp vegn pli e pli curt, saja la finamira clera.
A la biodiversitad manchia sia finamira da 1,5 grads, ha ditg il rectur da l'Universitad da Turitg Michael Schaepman avant il forum da sis dis. D'enconuscher la finamira saja però central per pudair definir la via e las mesiras da protecziun concretas. La diversitad da las spezias saja en in stadi desolat, uschia Schaepman.
